Undirbúningur

Til að fá sem mest úr brúðkaupsmyndunum er mikilvægt að huga að því hvar dagurinn byrjar. Undirbúningsferlið er ótrúlega mikilvægur partur af sögu dagsins. Á þeim tímapunkti er eftirvæntingin svo einlæg og allir fara í sitt fínasta púss, sérvalið fyrir þennan dag.

Þegar valin er staðsetning fyrir undirbúning er gott að vera meðvituð um heildarútlit rýmisins því það setur svip á lokaútkomu myndanna. Gott er að hafa rýmið snyrtilegt og nægilega rúmgott. Það getur orðið þröngt þegar förðun og greiðsla eru að snúast í kringum brúður, auk fjölskyldu og jafnvel vina.

Þar sem við notumst eingöngu við náttúrulega ljósgjafa er gott að hafa einhverja gluggabirtu. Ljós spilar mikinn þátt í hvernig myndirnar koma út. Kertaljós og minni gluggabirta gefa oft sjarmerandi og rómantíska stemningu meðan stórir gluggar gefa mikið og fallegt ljós. Hvort um sig er afar fallegt en gefur gjörólíka útkomu.

Ef þið gistið á hóteli í lok dags er afar líklegt að herbergið henti í undirbúning og tilvalið að annað ykkar hafi sig til þar. Eins er hægt að leigja auka hótelherbergi undir slíkt.

Myndatakan

Til að þið fáið sem mest úr myndatökunni reynum við að mynda á 2 mismunandi stöðum. Ef þið eigið börn er að sjálfsögðu velkomið að hafa þau með í myndatökunni.

Algengast er að myndatakan fari fram utandyra. Oft er hægt að nýta umhverfið í kringum athafnarstað til myndatöku og staðir nýttir sem eru á leiðinni í veisluna.

Snjalltækjalaus athöfn

Til þess að sýna sem best stemningu og tilfinningum á mynd, langar okkur að mæla með því að þið biðlið til gesta að sleppa sjálf myndatökum við athöfnina.

Okkur langar að sýna andlit gestanna ykkar en góð mynd getur auðveldlega eyðilagst og misst gildi sitt ef sími eða jafnvel spjaldtölva hylur andlitið.

Gestirnir ykkar virða það glöð að þið hafið ráðið fagmenn til að skrásetja athöfnina á ljósmyndir og þá geta gestir einbeitt sér að því að vera bara á staðnum og njóta.